| Temple Square is always beautiful in the springtime. Gardeners work to prepare the ground for General Conference. © 2012 Intellectual Reserve, Inc. All rights reserved. | 1 / 2 |
Si Quinn Price hingpit nga nabuta sukad pa sa dos ang edad.
Ang lumad nga taga Utah ug miyembro sa Ang Simbahan ni Jesukristo sa mga Santos sa Ulahing mga Adlaw miingon nga gibati niya nga nadasig sa hingpit nga pag-apil sa iyang tinuohan tungod sa daghang online nga mga kapanguhaan para sa may kakulangan nga gihatag sa Simbahan diha sa ChurchofJesusChrist.org ug pinaagi sa Gospel Library app.
Si Price miingon nga kasagaran mogamit siya sa Gospel Library app aron mangita og mga materyal sa Simbahan nga gimantala sa elektronik nga braille — usa ka kapanguhaan nga nakatabang kaniya nga mobati nga siya ingon og “mas epektibo nga makatampo isip miyembro sa Simbahan.”
“Sa una pa sa wala pa ako matawo nga posible alang sa mga buta nga makagamit sa tanang matang sa mga materyal sa Simbahan,” miingon si Price. “Apan, segurado ko nga kini dili ingon ka sayon. Kini nga mga kapanguhaan dako kaayo nga tabang sa akong personal nga edukasyon sa ebanghelyo, ingon man nga nakatabang kanako nga makaandam sa pagtudlo og mga klase ug paghatag og mga pakigpulong sa Simbahan.”
Ang Simbahan ni Jesukristo adunay kasaysayan sa pagsulay sa pagpalapad sa maabtan niini ngadto sa tanan kinsa adunay mga panginahanglan sa pisikal, pangisip ug emosyonal. Ang bag-o nga mga paningkamot mipasayon sa pagnabigar sa Disabilities.ChurchofJesusChrist.org pinaagi sa paghimo og mga seksyon nga may kalabotan ngadto sa piho nga mga grupo sa mga tawo ug piho nga mga hilisgotan.
Ang mga seksyon naglakip sa:
Ang mga seksyon mahimong maglakip og mga kasulatan, mga kinutlo gikan sa mga lider sa Simbahan, mga himan sa pagtudlo, kanunay nga mga gipangutana ug mga video aron sa paghatag og paglaom, pagtuo ug paglamdag ngadto sa tanan kinsa adunay kakulangan mismo o ngadto niadtong kinsa adunay personal nga relasyon sa usa ka tawo nga may kakulangan.
Si Katie Steed, disability specialist manager alang sa Simbahan miingon nga ang Disabilities.ChurchofJesushrist.org nga website nagtabang sa Simbahan sa pagtuman sa panlantaw niini, nga mao ang “pagtabang sa mga miyembro nga may kakulangan ug sa ilang mga pamilya nga maapil, makatampo ug mouswag.” Imbis tutukan ang mga panginahanglan sa kadaghanan sa mga miyembro sa Simbahan, si Steed miingon nga siya ug ang iyang grupo mibutang sa tanan sa ilang mga paningkamot sa pagtubag sa mga panginahanglan “sa usa.” Kini nagpasabot sa pagtubag sa mga panginahanglan sa daghan pa nga mga indibidwal kaysa gihunahuna sa mga tawo, siya mipasabot.
Si Steed miingon nga ang labing bag-o nga ihap sa populasyon [census]sa Estados Unidos mitino nga 19.6% sa populasyon adunay kakulangan. “Mao nga, kon ato kanang gamiton sa atong mga numero sa miyembro sa Simbahan sa tibuok kalibotan,” mipadayon si Steed, “kini mahimong mga usa sa kada lima ka miyembro sa Simbahan kinsa adunay kakulangan.”
Pinaagi sa website ug app nga mga kapanguhaan niini, ang Simbahan naglaom sa pagtabang dili lamang sa kadtong adunay kakulangan, apan usab sa mga lider sa Simbahan, mga ginikanan ug uban gamit ang mga himan, mga kapanguhaan ug mga materyal nga mobayaw ug molamdag sa espirituhanon nga paagi sa tanan. Samtang adunay daghang kapanguhaan alang sa buta ug bungol, adunay mga kapanguhaan usab alang sa pagtabang sa mga indibidwal nga may autism, Down syndrome ug ubang mga kakulangan.
Pagpatigbabaw sa mga Opinyon
Kini nga mga kapanguhaan makita ubos sa Disabilities sa Life Help nga seksyon sa website sa Simbahan ug diha sa Gospel Library app. Tanan nga mga kapanguhaan gibase sa pagsiksik ug giaprobahan sa mga boluntaryo kinsa mga bungol, buta, o ang ginikanan sa usa ka bata nga adunay kakulangan o adunay propesyonal nga kasinatian sa natad sa kakulangan. Ang grupo bahin sa kakulangan didto sa Punoang Buhatan sa Simbahan nagsugod sa pakigtagbo niini nga mga boluntaryo sobra sa milabay nga duha ka tuig aron sa paghatag og mahinungdanon nga mga sugyot og komentaryo kabahin sa mga himan ug mga kapanguhaan nga gihatag sa Simbahan alang sa paggamit sa publiko.
“Naningkamot kami nga dili mohimo og mga pangagpas kon unsay gusto sa mga tawo,” miingon si Steed. “Kining tanan naggikan sa usa ka komon nga panultihon sa natad sa mga kakulangan, ‘Walay Kabahin Kanamo nga Wala Kami.’ Gusto namo nga ipatigbabaw ang ilang mga opinyon. Mao nga, tan-awon namo ang pagsiksik, ug dayon makig-istorya kami sa among mga sakop aron makaseguro nga tinuoray kaming naminaw ug nagtubag sa ilang mga panginahanglan.”
Kini nga pilosopiya, uban sa kanunay nga pagpaminaw sa mga opinyon gikan sa uban, makatabang sa pagtutok sa mga problema nga tingali nabaliwala o wala nabantayan kaniadto.
“Adunay pipila ka butang nga gipahibalo kanako nga wala gayod unta masayri kon wala ang usa ka inahan nga kinasingkasing nga misulti kanako mahitungod sa mga panginahanglan sa iyang anak,” miingon si Steed. “Lisod unta ang pagpangita niadto nga mga panabot kon walay pagpaminaw.”
Miingon siya nga naglaom siya nga mas daghang tawo ang mopahimulos sa mga kapanguhaan nga gihatag sa Simbahan ug makaila nga naningkamot ang Simbahan sa pagseguro nga mobati ang tanang tawo nga sila gipaminaw: “Gibuhat namo ang among labing maayo aron maabot ang tanang mga anak sa Dios,” miingon siya.
Bisitaha ang ChurchofJesusChrist.org/life/disability aron makakat-on og dugang mahitungod sa mga kapanguhaan sa Simbahan bahin sa kakulangan. Kini nga mga kapanguhaan anaa usab sa inyong mobile device diha sa Gospel Library app.